ქართველოლოგიური რესურსების ციფრული დამუშავების ისტორია სამ ათეულ წელს ითვლის და განვითარების რამდენიმე ეტაპი განვლო. რესურსების გაციფრულების პერველ ეტაპზე დაბეჭდილი ტექსტები მუშავდებოდა ოპტიკური სკანერის მეშვეობით და შემდეგ „იკითხებოდა“ ციფრული ტექსტის ფორმატში სპეციალური პროგრამული უზრუნველყოფის საშუალებით (OCR), რომელსაც შეეძლო ცალკეული გრაფემების „აღქმა“, მათი იდენტიფიცირება ანბანის შესაბამის სიმბოლოებთან შედარების გზით და ამოცნობილი ასოების თანმიმდევრობის შენარჩუნებით ტექსტის შენახვა ელექტრონულ ფორმატში. ქართული ენის რესურსების გაციფრულებამ მიმდინარე ეტაპზე არსებითი ცვლილება განიცადა. თანამედროვე, ციფრული საუკუნის პირობებში მიმდინარე ტექნიკურმა რევოლუციამ ოპტიკური ამოცნობის სრულიად ახალი პერსპექტივები შექმნა – შეიქმნა ხელოვნურ ინტელექტზე (AI) დაფუძნებული ხელნაწერი ტექსტის ამოცნობის (HTR) წვრთნადი პროგრამული უზრუნველყოფა, რომელიც ქართული ანბანით დაწერილი ტექსტებისთვისაც არის განკუთვნილი (იხ. https://adh.ge/wp-content/uploads/2025/01/Gippert_DiKa_3.pdf). პროექტის ფარგლებში მოხდება აღნიშული პროგრამული საშუალების eScriptorium-ის დახვეწა-გავარჯიშება პალიმფსესტური ხელნაწერის Codex Sinaiticus Rescriptus-ის ბაზაზე.