Menu
ფუნქციური სიტყვები (სინსემანტიკები), მიუხედავად იმისა, რომ სემანტიკისაგან არიან დაცლილი, გამოყენების თვალსაზრისით მაღალი სიხშირით გამოირჩევიან და სტრატეგიულ როლს თამაშობენ დისკურსში – კოჰერენტულობასა და კოჰეზიას ძირითადად ფუნქციური სიტყვები უზრუნველყოფენ ტექსტში. ფუნქციური სიტყვები ხელს უწყობენ იდეებს შორის ლოგიკური ურთიერთმიმართებების გამოხატვას, ლოგიკურ კავშირებს ამყარებენ წინადადებებს შორის, ახდენენ კომუნიკაციის მოდერირებას, არგუმენტების ორგანიზებას და მსმენელებს/მკითხველებს ეხმარებიან რთული იდეების გადმოცემა-გაგებასა და სრულფასოვან კომუნიკაციაში. ფუნქციური სიტყვები აუცილებელია მიზეზ-შედეგობრიობის, კონტრასტის, პირობითობისა და თანმიმდევრულობის სიგნალიზაციისთვის. პროექტი მიზნად ისახავს ფუნციური სიტყვებისა და ფრაზული კონსტრუქციების შესწავლას ქართულში და მათი ფუნქციურ-სემანტიკური მნიშვნელობების გამოვლენას კორპუსულ კვლევებზე დაყრდნობით.
პროექტის თემა ერთ-ერთ უმნიშვნელოვანეს და აქტუალურ საკითხს წარმოადგენს ციფრულ ეპოქაში ყველა ენისათვის. დღეს, თანამედროვე ტექნოლოგიების მზარდი განვითარებისა და გამოყენების აუცილებლობის ფონზე, განსაკუთრებული მნიშვნელობა შეიძინა ფუნქციური სიტყვებისა და კონსტრუქციების კვლევამ მრავალი მიმართულებით: საკომუნიკაციო აქტის სრულფასოვანი წარმართვა/გაგების, ინფორმაციის სწრაფი დამუშავების, ავტომატური სათარგმნელი პროგრამების დახვეწის, და, რაც მთავარია, ხელოვნური ინტელექტის ეფიციენტური გამოყენების მიზნით, განსაკუთრებით ისეთი ამოცანების შესრულებისათვის, როგორიცაა ტექსტის სენტიმენტანალიზი.
კვლევის აქტუალობას განაპირობებს რეგიონული და საერთაშორისო კონტექსტიც: მსოფლიო მასშტაბით დღითიდღე აქტიურდება მცირე/ეგზოტიკური ენების დიგიტალიზაცია. ამ პროცესში განსაკუთრებული სირთულეს ფუნქციური ელემენტების სწორი კვალიფიკაცია და ანალიზი წარმოადგენს. ქართულ ენას, როგორც რთული აგლუტინაციური სისტემის მქონე ენას, ამ პროცესში განსაკუთრებული ადგილი უჭირავს. პროექტის ფარგლებში ჩატარებული კვლევის შედეგები რელევანტურია სხვა კავკასიური ან მცირერესურსიანი ენების ციფრული განვითარებისათვის.
პროექტის მიზანია ქართულში ფუნქციური სიტყვებისა და კონსტრუქციების იდენტიფიცირება, ანალიზი (კლასიფიკაცია და კვალიფიკაცია) და კორპუსზე დაფუძნებული ელექტრონული მონაცემთა ბაზის შექმნა. კვლევა, ერთი მხრივ დაეფუძნება ქართული ენის ეროვნული კორპუსის მასალებს და გამოყენებული იქნება კორპუსლინგვისტური მეთოდები (კორპუსზე დაფუძნებული და კორპუსზე ორიენტირებული), რაც უზრუნველყოფს მიღებული შედეგების ხარისხს: სისტემურობას, სისრულესა და ყოვლისმომცველობას. თუმცა, კვლევაში ასევე გამოყენებული იქნება ტრადიციული მეთოდები (შედარება-შეპირისპირება, სუბსტიტუცია, პერლოკუცია, პერიფრაზი, სკოპუსი). გარდა ამისა, ფუნქციური სემანტიკის დასაზუსტებლად დამატებით გამოყენებული იქნება კომპეტენციის ტესტი (ცდისპირთა გამოკითხვა საგანგებოდ შემუშავებული კითხვარების მიხედვით) და ინტონაციური ანალიზი გენდერული და ასაკობრივი ბალანსის გათვალისწინებით.
პროექტის მიზნებიდან და მოსალოდნელი შედეგებიდან გამომდინარე პროექტის შედეგები საქართველოსთვის უდაოდ ეფექტური იქნება გრძელვადიან პერსპექტივაში ქვეყნის სამეცნიერო, საგანმანათლებლო და ენის ტექნოლოგიების პროგრესის თვალსაზრისით. კერძოდ:
ჩვენი გუნდი ყოველთვის მზად არის გაგიწიოთ კონსულტაცია
